Flotkassi

Bliki ÍS er færeyingur og líkt og aðrir eins bátar á hann það til að grafa sig svolítið niður að aftan á siglingu. Trefjar framleiða flotkassa á Skel 26 bátana og passar sá flotkassi þokkalega á færeying.

Neðri hlutinn snikkaður við bátinn. Kassinn er ætlaður á Skel 26 en passar með smá breytingum á færeying.

Þar sem kassinn er ekki ætlaður á þennan skrokk þurfti að ákveða botnlínuna og þar var kassinn engin hjálp. Smiðað var borð undir bátinn þegar búið var að stilla hann af. Þannig var auðvelt að renna kassanum frá til að skera af honum og svo slípa bátinn þar sem kassinn var plastaður á hann.

Hér er búið að leggja kassann að bátnum, þetta passaði frekar illa að sjá en þurfti samt ekki svo mikla vinnu til að láta hann passa nokkuð vel.

Loka þurfti fyrir pústið sem kemur bara annarsstaðar út en það gengur ekki að leggja það gegn um kassann. Sömu sögu var að segja um úttök fyrir lensidælurnar á hinni síðunni.

Hér er búið að tilla kassanum aftan á bátinn, bara eftir að fullplasta hann. Takið eftir spjaldinu sem er fest lárétt á stýrisblaðið, tilgangurinn með því var eflaust sá að reyna að lyfta afturendanum upp á siglinu. Nú má þetta spjald eflaust fara af.

Eins og áður sagði er kassinn ætlaður á Skel 26 sem er pínulítið öðruvísi í laginu. Þess vegna þurfti að skera hann vandlega að skrokknum til að fá hann til að passa. Vandinn við þá aðgerð er að láta kassann liggja jafnt beggja vegna.

Kassinn kominn á og búið að bera TopCoat á allt. Eigandinn ætlar sjálfur að slétta þetta og mála.

Svona lítur þetta út og vonandi dugar þetta til að aftra bátnum frá því að grafa afturendan niður og setja stefnið upp í loft á siglingu.

Flotkassi

Deila